Fréttastofunni hafa borist þær gleðifréttir að Ævar Þór
Benediktsson, rithöfundur, er kominn í leitirnar heill á
húfi. Lögreglan þakkar öllum fyrir veitta aðstoð,
fjölmargar ábendingar um ferðir Ævars bárust frá
spenntum lesendum.

​

Einherji, sem lengi hefur verið þekktur fyrir að vilja
Ævar út úr þessari vídd, elti hann í gegnum gjörvallan
miðbæ Reykjavíkur. Rétt áður en Ævar náði inn á
umferðarmiðstöð BSÍ náði Einherji að klófesta hann
með því að skjóta á hann klístri og gera honum ókleift
að flýja.

​

Fréttastofan náði tali af Ævari rétt áðan og bar kappinn sig vel miðað við aðstæður.
 

„Ég vaknaði í dimmu herbergi, bundinn við stól og vissi ekkert hvar ég var eða hversu lengi ég hafði verið þar. Svo heyrði ég í Einherja og óttaðist að ég myndi aldrei aftur sjá fjölskyldu mína,“ sagði hann blaðamanni.
 

Hann var einnig spurður um hvernig hann hefði sloppið. Ævar sagðist hann hafa nýtt reynslu sína af því að leika Lilla klifurmús í Þjóðleikhúsinu árið 2012.
Hann hafi sungið Einherja í svefn með laginu Dvel ég í draumahöll. Þegar Einherji var farinn að hrjóta hafi hann náð að losa af sér böndin, fikra sig um herbergið og finna glugga. Hann notaði því næst stólinn til að brjóta gluggann og prílaði út.
 

„Þá sá ég að ég var staddur í kjallaraíbúð á Karlagötu. Þaðan er stutt á lögreglustöðina og ég fór beint þangað. Það var ekki fyrr en þá að ég fékk það staðfest að ég var í  haldi Einherja í þrjá daga,“ endaði Ævar frásögnina áður en hann kvaddi.

​

Lögreglan fór í umrædda íbúð en Einherji var hvergi sjáanlegur. Hann hefur augljóslega vaknað og drifið sig inn í aðra vídd. Lögreglan hefur lokið málinu og við vonum að Einherji fari að finna sér önnur áhugamál en að hrella Ævar Þór.